نوشتہ کار: ساربان بلوچ
مٹ کروک: شمس سحر بلوچ
نوآبادیاتی ڈسکورس ہمو فکر، سوچ، بولی، چاہنداری نوشت، نمائندگی و ایلو داستان آتا مچی ءِ ہرافتے نوآبادیاتی طاغت آک ایلو راج، چاگڑد و رسم و دود آتے اسہ خاص ءُ وڑ اسیٹی پاننگ کن کاریم ئٹی ہیسرہ۔ نوآبادیاتی اٹکل نا کمک ئٹ نوآبادیاتی طاغت آتا سیاسی، معاشی، و ثقافتی بھلنی جائز و جُوان پاش کننگاکہ۔ نوآبادیاتی ڈسکورس ءِ پہہ مننگ کن اونا مرغن آ دیہاڑ ءِ پہہ مننگ المی ءِ۔
اگہ ”تینا“ و ”ایلو“ نا نیام ئٹ فرخ ئنا تصور مُست ہم ئسک، ولے پوسکن انگا نوآبادیاتی ڈسکورس خاص وڑئٹ یورپی نوآبادیاتی تالانی تون اوار پین سوگو مس۔ مست ئنا یونانی چاگڑد ئٹی یونانی بندغ آک تینے غیر یونانی بندغ آتیان جتا پاریرہ۔ اوفتے اکثر Barbarians پاریرہ۔ ولے نوآبادیاتی ڈسکورس نا پوسکن انگا دروشم ہمو وخت سوگو مرسا مون آ بس ہرا وخت پانزدہ و شانزدہ میکو صدی ٹی یورپی طاغت آتا سمندری سفر، تالان مننگ و جنگ آتے کَٹنگ نا بنا مس۔ پانزدہ وشانزدہ میکو صدی ٹی پرتگال، اسپین افریقہ، ایشیاء و امریکہ نا جتا جتا انگا بشخ آتیٹی تینا طاغت ءِ تالان کریر۔ پدا برطانیہ، فرانس و نیدر لینڈ ہم سوگو ءُ نوآبادیاتی سلطنت جوڈ کننگ نا بنا ءِ کریر۔ یورپ نا بندغ آک وڑ وڑ ئنا بندغ آتتون توڷ بش کریر و او بندغ آتا باروئٹ سفری نوشت، نخشہ، مذہبی نوشت و رپورٹ جوڑ کریر۔
دا نوشت آتیٹی بھاز جاگہ غا یورپی چاگڑد ءِ لائخ، گچین، عقلی و مُستی گام کروک لکھار۔ ایلو کنڈا غیر یورپی چاگڑد آتے نیزگار، غیر مہذب، جزباتی، بنائی و تینٹ راج کننگ نا بابت ئٹ نزور لکھار و نشان تسر۔ دا وڑ ئٹ ”تینا“ و ”ایلو“ نا تصور نوآبادیاتی سوچ ئنا اسہ خاص ءُ بشخ اس جوڑ مس۔ یورپ مدان مدان آ تینے اسہ اندنو معیار ئسے نا وڑئٹ جوڑ کرے کہ ایلو چاگڑد آتے یورپ نا ڈول ئٹ اُرنگ ءِ بنا کریر۔ امریکہ نا نوآباد کاری دانا اسہ مثیل ئسے۔ جہی آ بندغ آتے یورپی نوشت آتیٹی ہروخت ”وحشی،“ ”بے خوانندہ“ و غیر مہذب نشان تسر و پاریر۔ اندا وڑ ئٹ افریقہ ہم نیزگار و غیر مہذب بر اعظم نا وڑ ئٹ لکھنگا۔ ہرا وخت اسہ چاگڑد ئسے چڑہ چڑہ بِنائی و تینٹ حکومت کننگ نا حوالہ ئٹ نالائخ نشان تننگک و پاننگک گُڑا نوآبادیاتی طاغت آتیکن اوڑے دو سخت کننگ و تینے بھلن نشان تننگ اڑزان مریک۔
نوآبادیاتی ڈسکورس بیرہ ایلو بندغ آتا حوالہ ئٹ گڑاس خیال الوس بلکہ اونا سیاسی زہم آک ہم ئسر۔ اگہ نوآبادیاتی طاغت آک جہی آ بندغ آتے تینٹ حکومت کننگ کن نزور نشان ایتنگ کیرہ گڑا او داہم دعوی کننگ کیرہ کہ نوآبادیاتی حکومت اوفتا شونداری، لائخی و ایلو تہذیب کن المی ءِ۔
ہژدہمیکو صدی ٹی نوآبادیاتی ڈسکورس
ہژدہمیکو صدی ٹی روشن خیالی (Enlightenment)، ساٸنس، جغرافیہ، دیہاڑ و ایلو علمی پڑ تا شونداری نوآبادیاتی ڈسکورس ءِ پین سوگو کرے۔ یورپی زانتکار آک وڑ وڑ ئنا چاگڑد آتا درجہ بندی ءِ بنا کریر اوفتے جتا جتا بشخ کریر۔ بھلو کچ اسیٹی نظریہ آتیٹی بندغی چاگڑد ءِ شونداری نا وڑ وڑ ئنا گچ و سند آتیٹی بشخ کریر دن کہ بِنائی، ترقی پزیر، و مہذب۔
یورپی چاگڑد ءِ دا خیالی کچ ئٹی کل آن اول و بُڑز تخار۔ایشیاء و افریقہ نا چاگڑد آتے شیف خلکر۔ دا وڑ ئٹ چاگڑد آتا نیام ئٹی اسہ شیف بڑزی اس ودی کریر۔ دا وخت ئٹی علم و طاغت نا تعلق بھاز اہمیت تخا۔ پین چاگڑد ئسے نا بابت ئٹ معلومداری تخنگ، اونا شیف و بڑزی اونا خواننگ بیرہ علمی ءُ کاریم اس الو بلکہ دا علم ئنا سوب آن چاگڑد ءِ پہہ مننگ، اونا بست و بند ءِ کننگ و اودے دوٹی کننگ ہم اڑزان مس۔
نوزدہمیکو صدی ٹی نوآبادیاتی نظام
نوزدہمیکو صدی ٹی ہرا وخت آ کہ یورپی سامراج تینا بڑز انگا ہد ءِ رسینگا گڑا نوآبادیاتی ڈسکورس نا ادارہ جاتی دروشم پین سوگو مس۔ برطانیہ، فرانس و ایلو یورپی طاغت آک ایشیاء و افریقہ نا بھلا علاقہ غاتیا سیاسی کنٹرول دوئی کریر۔ نوآبادیاتی علم بیرہ چکر خلوک و ایلو مسافر آتیسکان محدود متو۔ حکومت، فوج، اسکول، یونیورسٹی، میوزیم، اخبار، نقشہ، و ایلو نوآبادیاتی بست و بند آک، نوآبادیاتی چاگڑد آتا بابت ئٹ علم ودی کریر و اودے کاریم ئٹ ہیسر، برطانوی ہندوستان دانا اسہ مثال ئسے۔ برطانوی نوآبادیاتی بست و بند ہندوستان نا بولی، مذہب، زات، قبیلہ، ایلمی، رسم و دود ایلو چاگڑد آتا ڈھانچہ نا بابت ئٹ بھلو کچ اسیٹی معلومداری مچ کرے و اوفتے وڑ وڑ نا انتظامی دروشم آتیٹی بشخ کرے۔
دا فرخ ہندوستانی چاگڑد ئٹی مالو آن ہم ئس ولے نوآبادیاتی ریاست دافتے اسہ خاص ءُ وڑ اسیٹ درجہ بندی تس و سوگو کرے تاکہ دافتے انتظامی و سیاسی مسخت آتیکن کاریم ئٹ ہتین۔ دا وڑ ئٹ علم، درجہ بندی، بست و بند و طاغت اسٹ ایلو تون سوگوی ئٹ اوار مسر۔
تہذیب نا مسخت Civilizing Mission
نو آبادیاتی ڈسکورس نا اسہ خاص ءُ بشخ اس Civilizing mission یعنی تہذیب یافتہ جوڑ کننگ نا مسخت نا خیال ئس۔ نوآبادیاتی طاغت آک تینا شابیتی ءِ بیرہ کَٹنگ، ڈغار یا ایلو مڈی تے دوئی کننگ نا دروشم ئٹ اُرتوسہ او بھازیکا دا دعوی ءِ کریرہ کہ او بندغ آتے تعلیم، قانود، سائنس، مذہب، و تہذیب نا سوب ئٹ مونی دننگ ئٹی ءُ یعنی شونداری تننگ ئٹی ءُ۔ برطانوی ہندوستان ئٹی دا مسخت کہ برطانوی حکومت بھازی پوسکنا خوانفنگ، و قانود ءِ شونداری نا وسیلہ پاریکہ۔ اندا وڑ ئٹ فرانس الجزائر و نوآبادیاتی علاقہ غاتیٹی فرانسیسی زبان، رسم و دود، تہذیب، و جدیدیت ءِ بھاز اہمیت نا وڑ ئٹ نشان تسکہ۔ ولے نوآبادیاتی حکومت ئٹی سیاسی کنٹرول، معاشی مسخت، و مڈی تا لٹ و پل و کنٹرول کننگ ہم اوار ئس۔ نو آبادی ڈسکورس نا اسہ خاصیت اس دا ہم ئس کہ بھلنی ءِ تہذیب، شونداری و جوانی نا زبان ئٹ مونا ہیسرہ۔
بولی و نوآبادیاتی طاغت
بولی ہم نوآبادیاتی ڈسکورس نا اسہ زریعت اس ئسک۔ نوآبادیاتی نظام آتیٹی بھازی کوزہ گیر نا بولی ءِ تعلیم، سرکاری پوریا، بست و بند و چاگڑدی شونداری تون گنڈوک تکارہ۔ برطانوی ہندوستان ئٹی انگریزی زبان تعلیم و بست و بند ئٹی تینکہ اسہ بھلو جہہ اس جوڑ کرے۔ داڑان انگریزی زبان ءِ پوسکنا تعلیم و چاگڑدی شونداری تون المی تکار، و جہی زبان و علم آتے بھاز وخت مچٹ ادارہ جاتی طاغت تسر۔ داڑان دا گڑا خننگ ئٹی بریک کہ نوآبادیاتی طاغت بیرہ ڈغار و سیاسی ادارہ غاتا کوزہ ئٹی ہتنگ کن کتوکہ بلکہ علم، بولی، رسم و دود و بندغ آتیا تینا چاگڑد نا باروئٹ ہم زہم شاغاکہ۔
بیستمیکو صدی ٹی مزاحمت و کاؤنٹر ڈسکورس
بیستمیکو صدی ٹی نوآبادیاتی چاگڑد آتا بندغ آک نوآبادیاتی نمائندگی و نوآبادیاتی کوزہ ءِ چیلنج کننگ نا بنا ءِ کریر۔ ایشیاء و افریقہ نا راج دوست آ نوآبادیاتی مخالف تحریک آک دا خیال ءِ رد کریر کہ یورپی طاغت آک نوآبادیاتی بندغ آتے نیزگار و شیف خلنگ نا حق ءِ تخرہ۔ او اسہ سوج اس ارفیر کہ اگہ نوآبادیاتی طاغت آک ننا درستی راستی ءِ کیرہ گڑا انت ننے تینا دیہاڑ، دود و ربیدہ، پجار و بروکا وخت ئنا تینٹ درستی راستی کننگ و پاننگ نا حق اف؟ دا مزاحمت آن کاؤنٹر ڈسکورس یعنی مخالف بیانیہ اس ودی مس۔ نوآبادیاتی بندغ آک بیرہ ”other“ مرسا رہینگتوس کہ ایلو طاقت آک اوفتا بابت اٹ ہیت کیر۔ او تینٹ سوگو مسر، اسہ سرحال اس مسر و تینا دیہاڑ و نمائندگی ءِ تینٹ کننگ بنا کریر۔
فرانز فینن
نو آبادیات نا نفسیاتی و دود و ربیدئی زہم آتے پہہ مننگ ئٹی فرانز فینن نا اسہ جوانو کڑد اس ئس۔ فینن دا ہیت ءِ پارے کہ نوآبادیاتی بھلنی بیرہ زمین، سیاست و معاشی نظام آ زہم شاغپک بلکہ بندغ نا پجار و تینا باروئٹ اونا خیال آ ہم زہم شاغک۔ اگہ اسہ بندغ ئسے چڑہ چڑہ دا پاننگے کہ اونا بولی، دود و ربیدہ، چاگڑد و دیہاڑ نزور و شیف شیف ءُ و نوآبادیاتی طاغت آتا بولی و دود و رسم بُڑز و بھلن ءُ تو مننگ کیک کہ او بندغ دا خیال آتے تینا است ئٹ منے۔ داڑان دا نن سرپد مرینہ کہ نوآبادیاتی بھلنی جسمانی و سیاسی طاغت آتیان بیدس نفسیاتی و دود و ربیدئی وڑ تیٹ ہم مننگ کیک۔ فینن نا کاریم ننے دا ہم سرپند کیک کہ نو آبادیاتی حکومت نا ایسر مننگ آن گڈ ہم نوآبادیات نا زہم آک پجار ئٹی رہینگرہ۔
ایڈورڈ سعید و اوریئنٹلزم
نوآبادیاتی ڈسکورس نا پوسکن آ علمی فہم ئٹی ایڈورڈ سعید نا کاریم اونا پنی آ کتاب ”Orientalism “ نا دروشم ئٹ اسہ بھلو زہم اس تخک، داکتاب 1978 ئٹی شینک مس۔ Said دا دلیل ءِ تس کہ دے کہی دے ٹک یعنی Orient نا بابت ئٹ اسہ خاص وڑ نا علم و نمائندگی اس ودی کرے۔ بھاز انگا دے کہی نا ادبی، علمی، سفری و دود و ربیدئی نوشت آتیٹی دے ٹک نیمہ ءِ پر اسرار، بے وڑ، نیزگار، عقل آن ہورک و دے کہی ءِ عقلی، پوسکن، سائنسی و مہذب لکھار و نشان تسر۔ Said نا بنیاتی آ دلیل دا ئس کہ دا نمائندگی ہر وخت غیر جانب دار مفک۔ دا طاغت نا نظام آتتون اوار گنڈوک مننگ کیک۔ ہرا وخت کہ اسہ سوگو ءُ چاگڑد اس پین چاگڑد ئسے نا اسہ خاص ءُ وڑ اسیٹ درستی راستی ءِ کیک گڑا او چاگڑد نا اسہ غالب ءُ عکس اس ودی مریک و داڑان بندغ آتا سرپند و پہہ مننگ آ زہم تمک۔
مشل فوکو، علم و طاقت
ایڈورڈ سعید نا خیال آک مشل فوکو نا کاریم تون ہم سیالی تخرہ۔ جوان وڑئٹ فوکو نا علم و طاغت نا نیام ئٹ تعلق نا شرہ آن نن خننہ کہ ایڈورڈ و فوکو نا خیال آک تینتون گنڈوک ءُ۔
دا خیال پائک کہ علم و طاغت نا اسٹ ایلو تون سوگو ءُ سیالی اس ارے۔ نوآبادیاتی ماحول ئٹی آبادی ئسے نا باروئٹ علم ودی کننگ دن کہ مذہب، بولی، جغرافیہ، رسم و دود آبادی، چاگڑدی بناوٹ و سیاسی تنظیم آتا بابت ئٹ -- بیرہ علمی ءُ کاریم اس الو۔ دا علم نوآبادیاتی بندغ آتے بندغ آتا درجہ بندی، انتظام و حکومت کننگ ئٹی کمک تننگ کریکہ۔ اندا سوب آن نن دا پاننگ کینہ کہ علم نوآبادیاتی طاغت نا نظام نا اسہ بشخ اس جوڑ مننگ کریکہ۔
ایسر
نوآبادیاتی ڈسکورس نا مُچا دیہاڑ ءِ اسہ مرغن ءُ دروشم اسیٹی پہہ مننگ کینہ۔ مست ئنا وخت ئٹی ”self“ و ”Other“ نا فرخ اسہ پدندارہ اس ننے تس۔ یورپی پٹ و پول غیر یورپی چاگڑد آتیکن پوسکنو نمائندگی ودی کرے۔ روشن خیالی دا نمائندگی تے درجہ بندی نا نظام آتا ذریعت ئٹ زیات علمی و سائنسی دروشم تس۔ نوزدہمیکو صدی نا سامراجیت دا علم ءِ نو آبادیاتی ادارہ غاتیٹی شاغا۔ Civilizing Mission شونداری و تہذیب نا بولی نا ذریعت ئٹ نوآبادیاتی حکومت ءِ جوان نشان ترسا کرے۔ تعلیم و بولی نا پالیسی دود و ربیدئی زہم ءِ سوگو کرے۔ نوآبادیاتی مخالف تحریک آک دا نمائندگی تے ہکل کریر۔ فینن دافتا نفسیاتی و دود و ربیدئی زہم آتے پاش کرے۔ پدا ایڈورڈ سعید تینا اوریئنٹلزم نا تصور نا ذریعت ئٹ دے ٹک نا نمائندگی، علم و طاغت نا اسٹ ایلو تون سیالی نا جاچ ءِ ہلک۔
بایدے کالونیل ڈسکورس ءِ بیرہ ”نو آبادیاتی آلہ کار آتا ہیت“ آتا دروشم ئٹ سرپند مفن بلکہ دا اسہ بھلو فکری نظام ئسے ہرا نا ذریعت ئٹ چاگڑد آتا درجہ بندی ءِ کیرہ، خوانرہ چاگڑد آتے و اوفتا بابت ئٹ فیصلہ کیرہ و دا پارہ کہ ہرا بندغ آک مہذب یا غیرمہذب، پوسکن یا نیزگار، عقل مند یا بے عقل بھلن یا چنک ءُ۔ اگہ نن دیہاڑ ءِ ہُرن گڑا نوآبادیاتی طاغت آک تینے پوسکن، مہذب و بھلن پاریرہ و نوآبادیاتی بندغ آتے نیزگار، بنائی، نزور پارسا کریرہ۔ دانمائندگی نا ذریعت ئٹ نوآبادیاتی حکومت ءِ المی، فائدہ تروک یا اخلاقی وڑ ئٹ جائز پاریرہ۔ اندا خاطران کالونیل ڈسکورس نا خواننگ بیرہ گدرینگوکا وخت ئنا خواننگ اف بلکہ دا ننے دا پہہ مننگ ئٹ کمک ایتک کہ نوآبادیاتی حکومت نا ایسر مننگ آن پد ہم اونا زہم آک بولی، تعلیم، دود، پجار، علم و ایلو وڑ وڑ ئنا چاگڑد آتا نمائندگی ٹی رہینگن کننگ کیک۔
بلوچستان نا پوسکنا سیاسی دیہاڑ ءِ اگہ نن نوآبادیاتی ڈسکورس نا تصور نا وڑ ئٹ ہُرن گڑا دیہاڑی تدینی تیٹی طاغت، نمائندگی بھلنی و حاشیہ نا نیام ئٹ سیالی ننے صاف خننگ ئٹی بریک، 1948 آن پد بلوچستان ئٹی بناء مروکا سیاسی مزاحمت ءِ دا پام ئٹ ہُرنگ کینہ کہ مرکزی ریاست تینا علاقائی رکھ، راجی مچی، و ریاستی اختیار ءِ بنیاتی بیانیہ نا دروشم ئٹ مون آ ہیس و بلوچ راج دوست ٹولی تا باسک آک دا گڑا ءِ تینا سیاسی آزاتی، پجار و حق آتیکن دوئی کریر۔ دن دا اسہ دیہاڑی تدینی نا ارا جتا ءُ نمائندگی مون آ بسر، اندا نمائندگی نوآبادیاتی ڈسکورس نا اسہ بشخ ئسے۔ انتئے کہ طاغتور فریق دا لائخی تخک کہ او اسہ تدینی ئسے ارا بولی و ارا مفہوم ئٹی تینا مسخت کن کاریم ئٹ ہتے۔ 1958-1959 ئٹی نواب نوروز خان نا کماشی ٹی مزاحمت نا وخت آ ہم سیاسی بیانیہ ٹی بغاوت، ریاستی نظم و سیکورٹی آ پام تسر۔ ایلو کنڈا بلوچ دادے سیاسی حق، وعدہ و خود اختیاری نا ویل ئنا وڑئٹ ہُرا۔
دا وڑ ئٹ مزاحمت کروکا ٹولی نا پجار و اونا عمل نا تعبیر تینٹ اسہ طاغت نا سیالی اسیٹی مٹ مس۔ 1960 نا مزاحمت و پدا 1973-1977 نا سلہہ بند جیڑہ ٹی ہم نن اندا عمل ءِ خننہ کہ ہراڑے بھلنی نا اختیار، امن و راجی وحدت ءِ اہمیت تسر۔ بلوچ قوم پرست بیانیہ سیاسی نمائندگی، صوبائی آزاتی، مڈی تیا جہی آ بندغ آتا اختیار ءِ بنیاتی آ ویل پارے۔ بلوچستان نا قدرتی مڈیک دن کہ سوئی گیس ہم نوآبادیاتی ڈسکورس نا پہہ مننگ کن اسہ مثال ئسے۔ انتئےکہ داڑے بیرہ دا سوج ودی مفک کہ گیس اراڑے ودی مریک بلکہ دا ہم مریک دا مڈی نا بابت ئٹ فیصلہ سازی دنا دو ٹی ءِ؟ رسینگوکا کٹ آن دیر سواد ارفک؟ و جہی ہنکین آتے دافتیان اخس بشخ رسینگک؟ ہر وختس کہ مڈی تا بابت ئٹ فیصلہ مرکز ئٹی مرے و جہی ہنکین و خاہوت آک دا فیصلہ غاتیان تینے مُر خنر گڑا مرکز و حاشیہ نا نیام ئٹ طاغت نا تعلق پین مونا پاش مریک۔
اندا وڑ ئٹ ریکوڈک ایلو سیندک کون آ منصوبہ غاتے دا خیال نا ذریعت ئٹ پہہ مننگ کینہ، ہراڑے ریاستی و معاشی بیانیہ قدرتی مڈی تے راجی ترقی، سرمایہ کاری و معاشی پیش رفت نا دروشم ئٹ ہتیک و پائک، اندا وڑ راج دوست و جہی آ ہنکین آک دا سوج ءِ ارفرہ کہ دا مڈی تیان جہی آ بندغ آتے انت رسینگانے و فیصلہ کننگ ئٹی اونا اخس است اوار ءِ۔ گوادر و سی پیک ہم دا ڈسکورس نا پوسکن آ مثال آک ءُ انتٸے کہ مرکزی ریاست و اونا ادارہ غاک گوادر ءِ شونداری، بندرگاہ، پوریا، سرمایہ کاری و پوسکنا اسٹرکچر نا دروشم ئٹ ہتنگ و جوڑ کننگ نا دعوی ءِ کیرہ۔ جہی آ خاہوت آتا بھاز آک دن کہ مچی ہلوک آک، ڈغار، پوریا، و ہندی اختیار و سیاسی اواری نا جیڑہ غاتے زیات اہمیت ایترہ۔
داڑے شونداری نا ارا جتا جتا ءُ تصور نن خننہ و کالونیل ڈسکورس ننے دا سوج ءِ ہرفنگ نا موکل ایتک کہ شونداری نا درستی راستی ءِ دیر کننگ ءِ؟ ایلو دنا توار ءِ شونداری نا عمل ئٹی مرکزی ہند رسینگانے؟ بلوچستان ئٹی زوراکی نا بیگواہی تا جیڑہ ہم نمائندگی نا دا ٹکر ءِ نشان ایتک انتٸے کہ ریاستی بیانیہ بلوچستان نا جیڑہ سیکورٹی، دہشتگردی و سلہہ بند جیڑہ غاتا پن ءِ ایتک۔ بلوچ بندغی حق و راج دوست آک دادے بندغی حق، سیاسی اختلاف، انصاف و شہری آجوئی نا جیڑہ نا دروشم ئٹ سرپند مریرہ۔ اندا وڑ ئٹ بلوچستان اسہ سیکورٹی ویل ئسے، اسہ خاص ءُ نمائندگی اس ودی کیک، ولے بلوچستان سیاسی و حق آتا جیڑہ ئسے، اسہ بدل اس کاؤنٹر ڈسکورس جوڑ کیک۔ اندا ہمو جاگہ ءِ ہراڑے سعید نا تصور نمائندگی خاص مریک انتٸےکہ دانا پاننگ نا ردئٹ طاغت بیرہ زمین یا مڈی تیا کوزہ کننگ نا ذریعت ئٹ آخہ بلکہ علم، بولی و نمائندگی نا ذریعت ئٹ ہم کاریم کیک۔ ہرا وخت اسہ راج اس چڑہ چڑہ نیزگار، شورش زدہ، سکیورٹی نا جیڑہ، یا شومداری نا آئری پاننگک گڑا اونا تینا سیاسی توار، دیہاڑ و پجار اسہ خاص ءُ فریم اسیٹی محدود مننگ کیک۔
بلوچستان نا معاملہ ٹی دانا مٹ اسٹ بلوچ کاؤنٹر ڈسکورس ارے ہرا تینا دیہاڑ، راجی پجار، مڈی تیا حق، سیاسی آزاتی، و بندغی حق آتے مرکزی ہند ایتک۔ دا مچا دیہاڑ نا برجائی آن دا خننگ ئٹی بریک کہ بلوچستان ئٹی کالونیل ڈسکورس بیرہ اسہ تدینی ئسے آخہ بلکہ ریاستی بیانیہ، مڈی تیا انتظام، شونداری نا منصوبہ غاک، سکیورٹی پالیسیک، سیاسی مزاحمت و ہندی ردعمل نا برجای سیالی ٹی ہُرنگ مریک۔ داڑان نن دا سرپند مرینہ کہ بلوچستان بیرہ اسہ جغرافیائی خطہ اس اف بلکہ اسہ اندنو سیاسی جہہ ئسے ہراڑے مرکز تینا بیانیہ و اختیار ءِ برجا تخنگ نا کوشست ءِ کیک و ہندی سیاسی طاغت آک تینا پجار، توار، و فیصلہ سازی نا حق اکن متبادل بیانیہ جوڑ کیرہ۔ بلوچستان نا تدینی تے کالونیل ڈسکورس نا وڑ ئٹ خواننگ نا مسخت دادے کہ نن ہر جیڑہ نا پد ئٹی مروکا اونا بنیاتی سوج ءِ ہُرن کہ طاغت دیر تون ءِ؟ کسہ ءِ دیر پاننگ ءِ؟ دنا توار ءِ بھلن تکرہ؟ بندغ آتے تینا دیہاڑ و بروکا وخت ءِ پاننگ نا اخس آزاتی ارے۔
.jpeg)